Poezi nga Agim Desku

Le të ndalim pak frymën, të mbajmë një minutë heshtje për dy të rinjtë Michal Svatos dhe Anna Kosinova dhe të lutemi që shpirti i tyre të ngrihet sa më lart në qiell, që të bashkohet me engjëjt e kësaj toke!








Poezi nga Agim Desku





VETËM NJË FJALË E KAM ANNA

Ah,bre Anna nuk vritet fjala
Vetëm një e kemi pasur legjendave
Jemi vrarë duke mbrojtur si bukën
Me atdheun e shqipve ngjanim sebashku.

Ah, bre Michal vetëm një fjalë kishim
Një mijë ngjyra ylberi mbante në krah shqiponje
Si ta them bre Anna,besë atdheu kishim
Zanat e zoti jetonin me ne dhe për ne.

Sot nuk e di cili është zoti im i vërtetë
Apo cili kemi humbë udhën e njerëzimit
Mos u bëmë mëkatar të diellit
Që harron të ngroh lulet me aromë shqipesh.

Ah,bre Michal kemi humbur zotin
Zanat u çmënden sot nga lotët tu dhe të Annës
Dashurinë e moren me vete tek yjet me frymë parajse
Ta kërkojnë ku na humbi besa e jonë,ah dikur besa e zotit.

Në cilin ferr u shndërrue, a cili djallë na mori krenarinë
Të qajta ,Anna të qajta Michal
Qajta edhe për besë e fe që dikur kishim për atdhe
Ah,të qaj edhe ty atdhe sot vallë cili më je.






SOT QAVA PËR TY ANNA


Pse ndërrojnë shekujt fytyrën
Të bukurën e moren më vete.

Në librin Çarl Harold shkruan kujtime
E ruan me zemër poeti Bajron.

Dikur paskemi pasur besë e fe
Zot e zana flisnin vetëm me ne.

Ah,po sot dua ta kujtoj Fishtën
Të flas me të vetëm dy fjalë.

Gjithnjë këndoja
O sa mirë me qenë Shqiptar.

Sot a mund të këndoj këtë këngë
Më beson o zot nuk e di se çfarë jam sot.

Sot dua të urrej vetën
I krisur po se po
A mos jemi çmëndur
Nga cilat plagë ma thuaj o zot.

Cilat dhembje urrejnë sot
Cilat këngë ma nuk do të këndohen kurrë
Ah,sot flas me Bajronin që pa besën time dikur
Sot edhe Fishtën e kuptoj për fjalët e pathena shpirti.

Vetëm ty o zoti im si të kuptoj
Pse nuk ishe mbrëmë të më mallkoje
Mua dhe fisnin tim, pse
Pse nuk e mbrove dashurinë në besë.

Kjo qenka dashuria e vrarë
Që shekujt kurrë nuk falin.

Sot qava dashurinë
Qava për ty,Anna
Qava për ty MICHAL.